Sciore sperdute

Sciore sperdute, sciore de muntagna,

nata mmieze a le ruve e la 'ramegna...

La turturella ha perse la cumpagna

e chiagne, chiagne, e nen z'arrassegna.

I' ch'haije perse u core, nen me lagne,

ca de l'amore mìe tu nen si degne,

l'acqua de le sciurille è tutta bagna,

e lùcene le stizze a la sulagna.

'N'coppa a nu carde rusce nu cardille

salutanne lu sole z'arrescalle

dent a lu piette mì' com'a nu 'rille,

lu core pe'l'amore semp abballa.

Ma quiste core è com'a na farfalla

che vole da nu sciore a nu sciurille,

e campa quante na jurnata calla,

e more pe' murì sempe tranquille.

'Nsieme a la mente, na chianta de ruta,

dent'a lu rieste che sa com'è nata...

La prima notte che te siè 'ddurmuta,

lu spose chiane chiane t'ha vasciata.

La luna curiosa t'ha veduta

'nsieme a l'amore tiè, stretta, abbracciata...

Essa, pe' gelusija, z'è 'nnascunnuta:

na nuvola, passanne, l'ha celata...

(Versi: Vittorio Barone - Musica: Alfonso Petrecca)